Rais Sirleaf wa Liberia awa Mwenyekiti mpya APRM

Na Hassan Abbas, Addis Ababa

Mpango wa Afrika Kujitathmini Kiutawala Bora (APRM) umempata Mwenyekiti wake mpya na mwanamke wa kwanza kushika wadhifa huo mkubwa kufuatia kuchaguliwa kwa Rais wa Liberia, Mama Ellen Johnson Sirleaf.

Rais Sirleaf alichaguliwa katika Mkutano wa Wakuu wa Nchi za Umoja wa Afrika Wachama wa APRM uliofanyika Jumapili jioni mjini hapa.

Katika uchaguzi huo ambapo Rais Jakaya Kikwete aliwakilishwa na Naibu Waziri wa Mambo ya Nje na Ushirikiano wa Kimataifa, Mahadhi Juma Maalim, Mama Sirleaf licha ya kuweka rekodi ya kuwa mwanamke wa kwanza pia anakuwa Mwenyekiti wa tatu wa Marais wa APRM tangu Mpango huo ulipoanzishwa mwaka 2003.

Sirleaf alichaguliwa kwa kauli moja kufuatia mpinzani wake Rais wa Senegal, Marcky Sall kujitoa. Rais Sall tayari ni Mwenyekiti wa taasisi nyingine ya AU, NEPAD.

Katika mkutano huo, Wakuu hao wa Nchi za APRM pia walitumia mkutano huo kumteua kiongozi wa Jopo la Tathmini ya Tanzania, Wakili Akere Muna kutoka Cameroun kuwa Mwenyekiti wa Baraza la Ushauri kwa Marais wa APRM na aliyekuwa Balozi wa Rwanda nchini, Fatma Ndangiza kuwa Makamu wake.

Akizungumza mara baada ya uchaguzi huo, Katibu Mtendaji wa APRM Tanzania, Rehema Twalib aliwapongeza viongozi hao wapya katika utendaji wa APRM Afrika akiuita uongozi huo kuwa ni “timu ya ushindi.”

APRM ni Mpango ulioanzishwa na Serikali za Umoja wa Afrika kwa lengo la kuhusisha wananchi wao katika kila nchi ili kufanya tathmini za mara kwa mara za utawala bora ili kubaini changamoto za kufanyiwakazi na mambo mazuri ya kuendelezwa.

Mpango huo ulianzishwa rasmi miaka 10 iliyopita na Tanzania ilijiunga Mei 26, 2004 na Bunge likaidhinisha Mchakato huo kuanza hapa nchini. Tayari APRM Tanzania imekwishakamilisha ripoti ya kwanza ya Hali ya Utawala Bora Tanzania na Serikali itaanza kufanyiakazi changamoto hizo katika bajeti za kila mwaka.